У пасляваенным інтэр’еры вёсак, мястэчак, а часам і гарадоў у пачатку, а больш у сярэдзіне ХХ ст. можна было сустрэць саладжава-стракатыя карцінкі на шкле. Нароўні з маляванымі дыванамі, вышытымі ручнікамі і ўзорыстымі тканымі посцілкамі яны выступалі ў якасці аднаго са складнікаў пасляваеннага інтэр’ера. Малюнкі на шкле садзейнічалі паступоваму ператварэнню сялянскай хаты з памяшкання пераважна гаспадарчага характару ва ўласна жылы, эстэтычна цэласны і завершаны інтэр’ер.

Сярод традыцыйнага роспісу на шкле можна сустрэць карцінкі розных жанраў: інтэр’ерныя карцінкі, карцінкі-рамкі для фотаздымкаў, абразкоў і абразы. Апошні лічыцца найбольш старажытным відам роспісаў на шкле і датуецца сярэдзінай ХІХ ст. (хатнія абразы).

Дадзеная калекцыя фотаздымкаў была сабрана падчас грамадскага збору, якія стартаваў ў 2021 годзе і працягваецца да гэтага часу. Большасць выяў роспісаў на шкле з’яўляюцца прыватнай уласнасцю. На момант стварэння сайта ў 2023 годзе сабрана 140 фотаздымкаў. У калекцыі можна знайсці нешматлікія імёны мастакоў роспісаў.

На жаль, якасць некаторых здымкаў пакідае жадаць лепшага. Але галоўнай мэтай стварэння калекцыі было – заахвоціць да збору малюнкаў на шкле, звярнуць увагу на гэты від традыцыйнага мастацтва і самае галоўнае паспець адшукаць іх у сваёй вёсцы.

На Вілейшчыне была зафіксавана асаблівая назва малюнкаў на шкле – “відзікі”. Яна і стала назвай суполкі, якая з’яўляецца інфармацыйнай падтрымкай калекцыі Instagram @vidziki.art


Выказваем падзяку ўсім, хто далучыўся да стварэння калекцыі!

Вольга Трубач